Os bailaríns Miguel Ángel Ponte, Berta Secall, Astrid Molinero e Juan Miguel Hernández impartirán estes talleres gratuítos en diferentes datas ata o 18 de decembro.

O Centro Coreográfico Galego pechará o programa formativo que está a desenvolver na súa sede da Coruña durante este ano 2015 cunha oferta de catro novos cursos de danza clásica. Os bailaríns Miguel Ángel Ponte, Berta Sacall, Astrid Molinero e Juan Miguel Hernández impartirán estes talleres, de carácter gratuíto, que se desenvolverán en diferentes datas ata o 18 de decembro.

Dirixidos tanto a profesionais como a estudantes de danza, estes obradoiros insírense no plan de formación continua que a unidade de danza da Consellería de Cultura, Educación e Ordenación Universitaria promove durante todo o ano e dentro do que xa tiveron lugar outra quincena de encontros centrados en diferentes estilos e técnicas. Con tal motivo, desprazáronse ata á Coruña recoñecidos mestres como Lázaro Carreño, Ana Abad Carlés, Catherine Turocy, Ana Serantes García, Íker Gómez, Ángel Rodríguez, Jordi Vilaseca, Antonella Sampieri, Gonzalo Zaragoza, Virginia Valero, Cristina Gallardo, Christelle Horna, Amaury Lebrun e Fernando Lázaro.

Para esta recta final do ano, contarase como profesores con catro bailaríns que formaron parte das últimas producións ou coproducións coreográficas desenvolvidas nas temporadas pasadas polo Centro Coreográfico Galego.

Repertorio, técnica de puntas e 'pas de deux'
Un total de 26 alumnos están matriculados no primeiro destes catro cursos, que comezou a impartir Miguel Ángel Ponte o pasado día 21. Centrado en danza clásica e, especialmente, no repertorio de 'Don Quixote', o encontro ten lugar todos os sábados ata o 19 de decembro.

Ao tempo, mantense aberto o prazo de inscrición para os tres obradoiros restantes: Berta Secall continuará afondando no repertorio do coñecido ballet de Marius Petipa do 2 ao 4 de decembro, mentres que Astrid Molinero abordará a técnica de puntas do 6 ao 8 de decembro e Juan Miguel Hernández, o 'pas de deux' do 14 ao 18 de decembro. As persoas interesadas deben formalizar a súa inscrición enviando ao correo electrónico This email address is being protected from spambots. You need JavaScript enabled to view it. o formulario que se pode descargar desde a páxina web centrocoreografico.org.