Os cineastas Sergei Loznitsa e Abel Ferrara protagonizarán encontros co público no marco desta programación, que se estende por toda a cidade con propostas paralelas como concertos, ‘live cinemas’ e obradoiros.
O Curtocircuíto Festival Internacional de Cine desvelou o programa da súa décimo terceira edición, que terá lugar do 3 ao 9 de outubro en Santiago de Compostela. A organización seleccionou para as súas seccións competitivas 65 curtametraxes de 19 países entre os preto de 1.200 filmes inscritos este ano, cifra que dá conta da consolidación do certame e do seu papel referente para o cinema máis innovador dentro e fóra de Galicia.